ප්‍රිය පාඨක මහත්වරුනි! (මහත්වරුන් විතරක් කියන්නේ මේ ලියන වඳුරු කුණුහරුපත් එක්ක ක්‍රිස්තියානු වික්ටෝරියානු සභ්‍යත්වයේ හැදී වැඩුණු, මලියදේව බාලිකාවට, දේවි බාලිකාවට, සුජාතාවට, මියුසියස් එකට, ආනන්ද බාලිකාවට, ගෝතමී බාලිකාවට, විශාකා එකට, සංඝමිත්තාවට, අනුලාවට, සුජාතාවට, රත්නාවලී බාලිකාවට, කළුතර බාලිකාවට ගිය බෞද්ධ නෝනා මහත්වරුන් මේ මඟුල කියවන්න වැස්සකටවත් එන්නට තියෙන ඉඩ ඉතාම අඩු බව ලියන මහත්මයා වන මම සහසුද්දෙන්ම දන්න හන්දා. ඒ නෝනා මහත්වරුන් කියවන්නේ සුජීව ප්‍රසන්නආරච්චි මහත්මයාගේ ආදර්ශමත් නවකතා හා කිරිබත්ගොඩ ඤාණානන්ද හිමියන් විසින් රචිත මෙලොව පරලොව සැප පිණිස වන සාර ගරුභ ධර්ම පුස්තක මිසක්කා මේ කුණුහරුප කතා නෙවෙයි කියලා ලියන මහත්තයා දන්නවා. )
විහාර සෝමා සඟබෝ රැජිනී
වැනි කුල අඟනුන් බිහි කළ මැනැවී!
පාඨක මහත්වරුනි! ඔබ තමුන්නාසෙලා දන්නවා බොහෝ ගම්මාන වල ඉන්නවා රොයිටර් නැන්දා කෙනෙක්. මේ රොයිටර් නැන්දාගේ රාජකාරිය තමයි ගමේ බිත්ති හතරවල් ඇතුළේ වෙන වැදගත් කාරණා කටයුතු හොම්බ දාලා එකතු කොරලා එකතු කොරලා ගෙන ගිහිල්ලා සමස්ත පොදු සමාජය දැනුවත් කරන එක. මහත්වරුනි, මේක මහත්ඵල මහානිසංස ඇති කුසල ක්‍රියාවක්. සාමාන්‍යයෙන් මේ වගේ භූමිකාවක් රඟ දක්වන්නේ එක්කෝ නිසි වයසට කරකාර බඳින්න බැරි වෙච්චි නැතිනම් හස්බණ්ඩා අකාලයේ මියගිය වෙනත් විවාහයක් කර ගන්න බැරි අපායේ කැලැන්ඩරේට මූණ දාගතෑකි ඇන්ටි කෙනෙක්. ඒ වගේම තමයි මේවා කවුරුත් සිතා මතා විනාස කරන්න කරන වැඩ නෙවෙයි, තමන්ගේ ඇඟ ඇතුළෙන්ම එන මානසික අවශ්‍යතා නිසා කරන දේවල්.
අපි ඒක තේරුම් ගන්න වුවමනායි මිත්‍රවරුණි.
ඒ වගේම තමයි පාඨක මහත්වරුනි බොහෝ ගම්මාන වල ඉන්නවා ඔය පොල් අතු කැපීම, බැලුං විකිණීම, ගොම් බෙටි එකතු කිරීම, මිනී වලවල් කැපීම, ටැට්ටර් එළවීම වගේ අස්ථිර රැකියා, සමාවන්න වැදගත් රාජකාරි වල නිරත වෙලා හැන්දෑවට දේශීය පානයෙන් පොඩියක් අනුමත වෙලා දේශීය හා ජාත්‍යන්තර සමාජ ආර්ථික දේශපාලන ප්‍රශ්න විසඳන බුවාලා පිරිසක්. සුද්දගෙ බාසාවෙන් කිව්වොත් ‘තින්ක් ටෑන්ක්’ එකක් හෙවත් හිතන ටැංකියක්.
ආගංගොඩත් ඔය අවශ්‍යතා දෙකම අපූරුවට සම්පූර්ණ කොරාපු ගම්මානයක් කියමුකෝ.
මේ ආගංගොඩ ජාත්‍යන්තර විස්ලේසක කණ්ඩායම හෙවත් හිතන ටැංකිය බොකු දිරාස් බෝතලයක් වටේ ගං කටුස්සෝ ටිකක් බැදගෙන, ටවුමෙ ගෙදරකින් පන්නපු ගෝල්ඩ් ෆිෂ් මාළු ටිකක් ඩෙවිල් කරලා එදාත් රැස්වුණා සමාජ ආර්ථික දේශපාලන විවරණයකට.
අද මාතෘකාව: සිරිසේන ගිරාම සේවක මහත්තයා ලියන අළුත් පොත.
(රොයිටර් නැන්දා තමයි බුවාලට ඔත්තුව දීලා තිබුණේ.)
අලබෝලේ: ටෞකණ්ඩ හැම වාසුගෙ..ගුඩු..ගුඩු.. පුතාලම දැන් පොත් ..ගුඩු..ගුඩු.. කියන්ඩ පටන් ..ගුඩු..ගුඩු.. අරගෙන නෙ. මුං හිතාගෙන ..ගුඩු..ගුඩු.. ඉන්නෙ මුන් ඔක්කෝම ..ගුඩු..ගුඩු.. රනිල් වික්කරමසිංහලා ..ගුඩු..ගුඩු.. කියලා වෙන්ඩ ඇති.
(..ගුඩු..ගුඩු.. ශබ්දය නැඟුණේ වචන මැද්දෑවෙන් බොකු දිරාස් වීදුරුවක් බොටම්ප්ස් අප් ලෙස බඩට ගිය හෙයින් බවද කලබොලේට රනිල් වික්‍රමසිංහ කියා කියැවුණේ මාර්ටින් වික්‍රමසිංහ කොග්ගල මහා ප්‍රාඥයාට බවද සැලකුව මනාය.)
ධර්මේ: ඒ වුණාට සිරා සිරා පොර. ගිරාම සේවක කාලෙ ඒකා ගල් අඟුරු බලාගාරයක් දාල ලැයිට් දෙන්නා වගේ ගම එළිය කොළා …උත්තො කනවා කියලා ඔහොම කටුස්සො කන්නෙ නෑ. නන්දිමිත්‍රයා කැවුන් කන්නැහෙ. මනුස්සයෙක් වගේ කාපිය…
අලබෝලේ: කෝමද දරුමේ අයියා මනුස්සයෙක් වගේ කටුස්සො කන්නෙ…?
(සභාවේ සිනා)
කළු උදිතේ: සිරිසේනයා කිව්වට බං ඔය පොත ලියන්නෙ සිරිසේනයා නොවෙන්නත් පුළුවන්. තොපිට මතකද අවුරුදු ගාණකට කලින් බටහිර කුමන්තරණ සමාගමකින් ඔය වගේ වියාපුරුතියක් කොළා..?
දැලි රාජා:...ගුඩු…ගුඩු…ගුඩු….ගුඩු…ගුඩු…ගුඩු….
අලබෝලේ:මොකාද යකෝ මේ මාලු ගෙනාවෙ? මේව්ව කැරපොතු හුජ්ජ රහයි ඩෝ!
කළු උදිතේ: ඔයීඊඊඊඊඊ…සිරිසේනයා කොරන්නෙ බටහිර කුමන්තරණ වියාපුරුතියක් වෙන්ඩ බැරිද ඩෝ…? .ඔය සූස්තිය පාස් කොරපං බල්ලා…
දැලි රාජා: ඕක්ක්ක්ක්ක්ක්ක්ක්ක්……………………………
දළඹුඅයියා: ආපහු කබරයා දැම්මද මේකා? රාජා, මොකද්ද බං උබේ ජීවිතේ? දවල්ට ප්‍රාදේසීය සබාවෙ පියුං රස්සාවෙන් ජරාව කනවා හවසට කාපු ජරාව වමනෙ කොරනවා…හුහ් හුහ් හූඌඌඌඌඋ
(සභාවේ මහ හඬින් සිනා)
ධර්මේ: කට වහපිය උත්තා. උදිතයගෙ කතාව ඇත්ත තම්යි. ඕක දේසපාලන වියාපුරුතියක් වෙන්න පුළුවන්. හැබැයි සිරිසේනයා දේසපාලන වසයෙන් ලොස්සා…තරුණ කාලෙ ඕකයි මායි ගියා චම්ලි ගුනවර්දන මහත්තයාට වැඩ කොරන්න…ගුනවර්දන මහතතයා මූව කැහැට්ට වගේ නිසා කොඩි එල්ලන්න වත් ගත්තෙ නෑ…පිම්පියා…
අලබෝලේ: කෝමද දරුමෙ අයියා දේසපාලන වසයෙන් සාර්තක වුණේ…?
දළඹුඅයියා: දරුමෙ අයියා නිරත සැබෑ ජාතිකවාදී දේශපාලනයක මල්ලීඊඊඊඊඊ…. ඝෝටා සෑර් බුදු වේවා. අපේ රත්තරන් මහත්තයා සැරියුත් මුගලන් වේවා….ග්ල්ප්…
ධර්මේ: කටවහගෙන ඔය මඟුල බීපිය උත්තෝ…තෝ මටත් ඉල්ලලා දෙන්නද යන්නෙ මැන්දිස් අයියාගෙන්…?
අලබෝලේ: (නටමින්) මැන්දිස් අයියා අපේ ගමේ උගත්තා…අසුපිට යනවා නැඟලා ලලයි ලිලයි ලා… ඉගිල්ලිලා යන කුරුල්ලො මැරිල වැටෙනවා.. එයාට කවුරුත් කිව්වෙ කවු…ද බොයි…
දැලි රාජා:...ගුඩු…ගුඩු…ගුඩු….ගුඩු…ගුඩු…ගුඩු….
ධර්මේ: සිරිසේන සිරා පොර පකෝ. මගේ ජීවිතේ වෙනස් කරපු එවුන්ගෙන් අම්මටට්යි තාත්තටයි යටින් තුන්වැනි තැන ඉන්නේ සිරිසේන ගිරාම සේවකයා…
(ධර්මේ ඒ කිව්ව කතාව අම්මපල්ලා ඇත්ත. කුකුල්ලු හොරකමකට ධර්මේ හිරේ ගියේ සිරිසේන මහත්තයා ගිරාම සේවක කාලේ පොලීසියට දීපු ඔත්තුවක් නිසා. හැබැයි ඊට පස්සේ ධර්මේ හැදුණා. කුකුල්ලු කෙහෙල්කැන් හොරකමේ ගියේ නෑ. බැසිල් මහත්තයගෙ ටැට්ටරේ එළවලා එදාවේල හොයා ගත්තා. ඉතින් සිරිසේන ගිරාම සේවක මහත්තයා ධර්මේගෙ ජීවිතය වෙනස් කළා කියනෙක සහසුද්දෙන් ඇත්ත.)
රවුටරේ: (මෙතක් නිහඬව සිට) දැන් සිරා ගන්ජා ගහලා ඔය පොත ලියනවා වෙන්න බැරිද…?
කළු උදිතේ: පුකේ ගන්ජා ගහන උත්තක් නෙවෙයි යකෝ, මේක අන්තර්ජාතික කුමන්තරණයක් වෙන්න පුළුවන්. ඔය වියාපුරුතියට කොටි සංවිදානෙ සම්බන්දතා තියෙනවද කවුද දන්නෙ…?
රවුටරේ: දැන් උදිතේ, උඹ මං ගැන හරියට නොදන්නවා නම් උඹ මං ගැනත් ඔය කතාව කියනවනේ….
ධර්මේ: තෝ ගැන නෙවෙයි උත්තෝ. මූට නම් අනිවා කොටි සංවිදානෙ සම්බන්ධයක් තියෙනවා. මුගේ අරමුන අපේ සැබෑ ජාතිකවාදී දේසපාලනය පරාජය කිරීම…..
දැලි රාජා: ඕක්ක්ක්ක්ක්ක්ක්ක්ක්……………………………
(මහත්වරුනි, මේ අවස්ථාවේ යම් ආශ්චර්යමත් සිද්දියක් සිද්ද වුණා. ඈත පාරක ගිය ජීප් එකක් පොලිස් ජීප් එකක් ලෙස වරදවා වටහා ගැනීම නිසා සභා තොමෝ ඉක්මන් ගමණින් නියරවල් උඩින් මඩේ වැටෙමින්, කැඩුණු සරොං කිහිල්ලේ ගසා ගනිමින් නියර කාපට් නොකරපු එවුන්ගේ මව් ගුණ සිහි කරමින් විසිර ගියා. ඒ ජීප් එකත් පොලිස් ජීප් එකක් නම් තමයි, හැබැයි ඇවිල්ලා තිබුණේ සමන්තභද්‍ර හිමි අතුරුදහන් වීම සම්බන්ධයෙන් මොකද්දෝ කාරණාවකටයි.)
කොහොම කොහොම හරි සභා තොමෝ විසිර යාමට පළමු ගත් අවසාන නිගනමය: සිරිසේන හිටපු ගිරාම සේවක මහතාගේ පොත ලිවීමේ වියාපුරුතිය කොටි සංවිදානයට අපේ සදාදරනීය මාතෘ භූමියෙන් කොටසක් කඩා දීම පිණිස කරන ජාති ද්‍රෝහී රාජ ද්‍රෝහී කුමන්තරනයක කොටසකි. සිරිසේන කොටියෙකි.
එයාට කවුරුත් කිව්වෙ කවු…ද බොයි…
ඔන්න ඕකයි මහත්වරුනි, දේශීය හා ජාත්‍යන්තර සමාජ ආර්ථික දේශපාලන කාරණා පිළිබඳ ආගංගොඩ හිතන ටැංකියේ අවසාන විද්වත් නිගනමය, සමාවන්න නිගමනය. වැදගත් මහත්වරුන්ගේ වැදගත් කතාබහ නිමා වෙන්නේ කෙස් පැළෙන තර්ක වලින් පසුව ඒ වගේ බිඳිය නොහැකි නිගමන වලට ඇවිල්ලා. සෙල්ලං නෑ කොල්ලෝ.
(විසි අට වැනි කොටසට…)
